من مذكرات الست فتاكات (2)

كتبهاعبلة زقزوق ، في 13 يونيو 2007 الساعة: 09:08 ص

قعدت الست فتاكات كل يوم يعدي… بتكبر هموم افكارها جبال؛ الراجل كبير في السن وهيه عايزه بنتها تخلف منه ولو حته عيّل يثبت حقها في الميراث؛ ما هو الشيخ عبد العال راجل كبّاره ويملك شئ وشويّات… جابت لها من عدة الحلاق وقالت لها إستحمي عليها كل يوم جمعه ثلات مرات… وجابت لها حتة رصاص وقالت: دي بركة ست نفوسة أم الصبيان… استحمي برضه بيها يمكن برَكتها تحل ويبقى أول خلفتك من الصبيان. دلال لكل كلام أمها تسمع وتنفذ بعد ما تاخذ إذن جوزها الشيخ عبدالعال.
تم المراد وطلعت الصغيره حامل… فكرت المسكينه أن فرحة الشيخ عبد العال هتخليه يطْلع عن دين وملة بخله ويجيب لها من الفرش أثاث جديد، أصل أمها فتاكات رضيت تجوزها على عفشه وفرشه القديم… الطمع في ماله نساها فرحة بنتها بالفرش الجديد، وقالت أجوزها له قبل عمره ما يعدي ولا يفوت على بنتي دلال.

جت شهور وفاتت شهور ووصل حملها تقريباً لآخره، بطنها كبرت ومحتاجه ملابس تليق… والشيخ عبد العال يقول لها: منين آدي الله وآدي حكمته يا ست البنات… كملي باللي عندك، ولا خلي أمك تتصرف وتديك هدوم من هدومها تكفي بطنك ألكام يوم اللي فضلين من عمر حملك.

الست فتاكات أحتار دليلها؛ ما كانش العشم فيك يا شيخ عبدالعال… بالبخل طلعت قاسي ولا رحمت شباب صبية أديتهالك بطيب خاطر وانا بتمنى أشوف بنتي معاك سعيده وفي العز… قالت له كده وهيه قاعده معاه… بعيد عن سمع بنتها دلال
رد وقال: اصل انا عارف طمعكم فيه… طمعنين في القرشين اللي حيلتي..ونفسكم تندارو وتلفوا وتنهبوا فيهم، هيه دهية عيشتي ولو مش عاجبك انت وبنتك الباب مفتوح يساع من الجمل ألوف.

عرفت الست فتاكات غلطتها في حق بنتها دلال بس بعد فوات الأوان.

وخلفت دلال صبي يشبها ويفوقها جمال… وعشم الأم لسه في حنية قلبه على ولده الصبي بعد ما فقدت عشمها في جمال ورقة وسن بنتها دلال.

والكلام لسه جي ليكم شايل لكم حكم يتعلمها منكم اللي لسه لمعنى الروايه مش فاهم.

أضف الى مفضلتك