من مذكرات الست فتاكات (4)

دلال بعد العلام… ومرور السنين أزدادت جمال، من رآها ونظر في عينيها شاف لمعه وبريق… ينطق ويسبح بالله.
أزدادت ثقة بالنفس، وقدره على مواصلة الكفاح.
شافها عطيه أنبهر رجع له شوقه وحنينه لحبها أيام صباه، بات ليله يفكر ويحلم بيها كمان؛ قرر يروح لامها ويعيد عليها الكلام بتاع زمان: دلال يا خالتي فتاكات أدورت وزاد جمالها وبان، وأنا دلوقت بقيت صاحب قهوه وراجل كسيب وعال، ومستعد أشيلها في عيوني هيه وابنها كمان.
هوه ده الكلام اللي قاله للست فتاكات لما زرها ليلة أمبارح؛
الست ما صدقتش ودنها وقالت: كلام ايه ده يا عطيه أنت شارب؟!! دلال متجوزه ولسه على ذمة جوزها الشيخ عبدالعال!!
وانت كمان متجوز وعندك تلاته من العيال.
رد وقال: ديه رغبتي وبعرضها عليكِ لجل ما توصليها لدلال، وهيه بقيت صاحبة الأمر والقرار.
الست فتاكات الزمن أخد منها رقات، ما عدش فيها القوه بتاعة زمان؛ سكتت؛ وهزت راسها في استسلام.
وعرضت كلام عطيه على بنتها؛ رفضته… وقالت له كده لما راحت قاصده محل عمله بالذات:
أنسى يا عطية أني أبدل الشيخ عبدالعال بيك أنت يا قهوجي… بص لنفسك واديها مقامها وانت ينعدل حالك أوام.
عطية مصمم أنه يواصل معاها المشوار في الكلام يمكن يميل عقلها ويكسبها زوجه وحبيبه كمان، فزاد من كلام العشق… أللي يغري البنات.
لكنها صدته بحزم… وقالت: لو ما بطّلتش كلامك الفاضي حروح لمراتك يا ابو العيال.
مشت دلال وكلامه عطيه بيرن في ودانها سايب أثر وفتح فيها حاجات… كانت نسيتها مع الايام والعيشه في بيت الشيخ عبدالعال.
لكن رفضها جه من أنها لايمكن تبدل شيخ جامع بواد كان صبي قهوه زمان.

ما كدبتش خبر وسعت بالخبر لبنتها دلال…
ولنا بكره لسه كلام نشوف ايه اللي هيجيبه الزمان… بعد وسوسة الشيطان في دماغ ست البنات.