مصر يا ام الغلابه الشقيانين
أغراب ولادك على الضفتين
ولا أحرار متسلطنين
بره مدارهم
حيرنين؟

مصر يا ام الغلابه الشقيانين
فين ولادك الطيبين؟
فين زرعك؟
فين خيرك؟
مستخبي ولا… خجلان
حزين؟!!

مصر يا أم الغلابه الطيبين
بسمتك لسه منوره بالضي ليل الحزين؟
ولا دمعتك…  بقيت تروي فدادين؟

بشوقي انا لسه.. ونار حنيني
لسجده فوق ترابك يا أم الشقيانين
ردي سؤالي
طفي ناري… هدي حيرتي
مصر يامه… يا أم الغلابه المتغربين
طمني قلبي بكلمتين
ارجع لأحضانك
ولا انسى أرضك وترابك؟
……..
ويا ترى هفضل سنين؟!!
ولا أشواقي هيغلبها الحنين؟